跟車若太貼, 車頭生痲疹


最近拎咗架車返廠換 cam 帶之餘,亦洗多咗錢去翻噴車頭泵把。
也許沒有人會將架車在沒有揩花撞崩的情況下, 走去把泵把
翻噴油,因為一旦翻噴過,下手買家就會以為我撞過車,咁印象分和賣價就大打折扣。

不過架車行走多年,個泵把,頭唇和車頭蓋都巳經好似生麻疹咁,花得好犀利。
實在花到頂佢唔順,去酒店俾人代客泊車,都怕失禮個職員

以前初學車時,揸得慢咪無事囉,後來揸熟咗, 就吓吓追住人哋個屁股行。
 50公里又咁哄住人哋屁股,100公里又哄住人哋屁股,哄得兩哄,就俾前車捲起的沙泥碎石,好似噴沙咁射向車頭。
就咁個車頭就好似生麻疹咁,越來越多花痕。


嗰 d 花痕係由細小沙粒或石仔高速撞擊漆面造成,漆面被撞會崩裂整塊脫掉, 露出黑色或灰色的底油,非常肉酸。
打蠟都遮唔到仲鞋拾拾咁。
越係近住地面的部份,花得越密越嚴重,打臘都整唔走。


車頭冚還好無咁花,因為
車頭冚鋼造夠硬,花得無咁勁, 但泵把頭唇是用製造比較軟,俾石仔一打就花,無咁襟。

泵把連頭唇共兩件野,噴油費計兩件,洗費都幾甘。

新噴好個泵把頭唇,好似新車咁靚仔,緊係唔想咁快又再整花。所以我唔再哄住人哋個屁股行,彈開好遠黎行,速度越快彈開就越遠。
但係咁做就有好多人從後爬頭,再我前面個空位,都好麻煩。
有 d 衰人仲鬼咁近咁樣 cut 入黎, 咁佢車呔捲起的沙塵會打花我個靚泵把,搞到我時常要勁剎車去避開呢 d 人喎, 幾衰呀。

所以政府話保持兩秒安全距離喎,係咁俾人爬頭
,再被打尖在前面插入黎,都唔安全得晒架。

有時見到後面條茂臣想插我頭,局住都要封住佢個位, 咪等佢又玩近距離 cut 線,幫我打花個泵把。

因為路中心,即係白線個位最多沙石積住係度,俾人係前面 cut 入黎,佢就要踩白線,咁就會捲起最多沙石打落我個泵把度, 仲衰過哄住前面架車...


結果試驗幾個月咁樣揸車法發現泵把頭唇仍保持原好無花,真係幾好。
不過用手摸吓, 巳經無咗新噴嗰種滑溜,輕微鞋咗少少。

所以唔想個車頭蓋泵把花得咁快,記住盡量唔好跟車太貼喇。


作者: holidaydriver
日期: 2011/08/07

返回頁首

留言

匿名表示…
「因為路中心, 即係白線個位最多沙石積住係度, 俾人係前面 cut 入黎, 佢就要踩白線, 咁就會捲起最多沙石打落我個泵把度....」俾人係前面 cut 入黎, 為何就要踩白線呢? 我不懂這句意思, 可否詳細解釋一下呢? 謝謝!

這個網誌中的熱門文章

ELLE 行李箱維修

轉換行車線心得