跟車若太貼, 車頭生痲疹

最近拎咗架車返廠換 cam 帶之餘, 亦洗多咗錢去翻噴車頭泵把。
也許沒有人會係沒有揩花撞崩的情況下, 走去翻噴泵把, 因為一旦翻噴過, 下手買家就會以為我撞過車, 咁印象分就打折扣。
不過架車行走多年, 個泵把, 頭唇和車頭蓋都巳經好似生麻疹咁, 花得好犀利, 實在頂佢唔順, 俾人泊車都怕失禮個車手。
以前初學車揸得慢咪無事囉, 後來揸熟咗, 就吓吓追住人哋個 pat pat 行。 50又咁哄住人哋 pat pat, 100又哄住人哋 pat pat, 哄得兩哄, 就俾前車捲起的沙泥碎石, 好似噴沙咁射向車頭, 就咁個車頭就好似生麻疹咁, 越來越多花痕。

嗰 d 花痕係由細小沙粒或石仔高速撞擊漆面造成, 漆面被撞會崩裂整塊脫掉, 露出黑色或灰色的底油, 非常肉酸, 打咗蠟遮唔到仲鞋拾拾咁。越係近住地面的部份, 花得越密越嚴重, 打臘都整唔走。
車頭冚還好因為鋼造夠硬, 花得無咁勁, 但泵把頭唇膠造比較軟, 一打就花, 無咁襟。
泵把連頭唇共兩件野, 噴油費計兩件, 都幾和味。

新噴好咗個泵把頭唇, 好似新車咁靚仔, 緊係唔想咁快又再整花, 所以我唔再哄住人哋個 pat 行, 彈開咗好遠黎行, 速度越快彈開就越遠。但係仍然有好多人 cut 入黎攝我前面個位, 有 d 衰人仲鬼咁近咁 cut 入黎, 咁會打花我個靚泵把, 搞到我要勁剎車避開佢喎, 幾衰呀。

所以政府話保持兩秒安全距離喎, 係咁俾人係前面打尖插入黎, 都唔安全得晒架。

有時見到後面條茂臣想插我頭, 局住都要封住佢個位, 咪等佢又玩近距離 cut 線, 幫我打花個泵把。因為路中心, 即係白線個位最多沙石積住係度, 俾人係前面 cut 入黎, 佢就要踩白線, 咁就會捲起最多沙石打落我個泵把度, 仲衰過哄住前面架車...
結果發現真係幾個月咁樣揸車法, 泵把頭唇仍保持原好無花, 真係幾好。不過用手摸吓, 巳經無咗新噴嗰種滑溜, 輕微鞋咗少少。
所以唔想個車頭蓋泵把花得咁快, 記住盡量唔好跟車太貼喇。

[2011-08-07, holidaydriver, holiday driver]

1 則留言:

  1. 「因為路中心, 即係白線個位最多沙石積住係度, 俾人係前面 cut 入黎, 佢就要踩白線, 咁就會捲起最多沙石打落我個泵把度....」俾人係前面 cut 入黎, 為何就要踩白線呢? 我不懂這句意思, 可否詳細解釋一下呢? 謝謝!

    回覆刪除